Tónfræðigreinar

(Hægt er að nálgast stundaskrár með því að smella hér)
Við Tónlistarskólann á Akureyri er öflug tónlistarkennsla. Kenndir eru eftirfarandi áfangar:

• Tónæði í 3. og 4. bekk
• Skapandi tónlistarmiðlun fyrir 5. og 6. bekk (1 ár)
• Grunnnám G 1 (áður tónfræði 2)
• Grunnpróf G 2 vetur (áður tónfræði 3)
• Miðnám 1. ár (áður tónfræði 4)
• Miðnám 2. ár (áður hljómfræði 1 og tónheyrn 1) Tekið er samræmt miðpróf á vegum Prófanefndar Tónlistarskóla að loknum þessum áfanga.
• Miðnám 1. ár rytmískt
• Miðnám 2. ár rytmískt, Samkvæmt aðalnámskrá verður samræmt miðpróf á vegum Prófanefndar Tónlistarskóla að loknum þessum áfanga í náinni framtíð.
• Framhaldsnám 1.-3.ár (áður hljómfræði og tónheyrn 2 - 4)
• • Kontrapunktur (valgrein í framhaldsnámi)
• • Tónlistarsaga I-II (framhaldsnám)
• • Íslensk tónlistarsaga (valgrein í framhaldsnámi)
• • Kórstjórn (valgrein í framhaldsnámi)

Nemendum á áfangabraut ber skylda til að stunda nám í tónfræði samhliða hljóðfæra-/söngnámi. Nemendur sem komnir eru í 5. bekk fara í skapandi tónlistarmiðlun. Í 7. bekk fara nemendur í tónfræði. Hver áfangi er kenndur 1 klst. í viku þar til í Miðnámi á 2. ári þá eru það 2 klst. á viku, og miðað er við, að til að ljúka framhaldsprófi í tónfræðagreinum liggi 7-8 ára nám að baki.

Tónæði
Í Tónæði eru stigin fyrstu skrefin í tónfræðanámi við Tónlistarskólann.
Námið er byggt upp á leik, söng og hreyfingu og er mikil áhersla lögð á
það að koma til móts við áhuga, þroska og þarfir nemendanna.  Þeir
nemendur úr 3. og 4. bekk sem eru skráðir til náms í Tónlistarskólanum á
Akureyri hefja sjálfkrafa nám í Tónæði en einnig er hægt að skrá sig
sérstaklega í Tónæði námið í gegnum Tónlistarskólann á Akureyri.

Skapandi tónlistarmiðlun
Í skapandi tónlistarmiðlun er kennd tónfræði á sem fjölbreytasta máta í gegnum tónlist.   Aðaláherslan er að læra og skilja tónfræðina í gegnum verknað en ekki af blaði.  Lagðar eru áherslur á tónheyrn, hlustun, hljóðfæravinnu, tónsköpun, hreyfingu, leiki og söng.  Stuðst er við aðalnámskrá tónlistarskóla í tónfræðigreinum í skapandi tónlistarmiðlun.

Rytmísk Tónfræði 1 og 2
Kennsla í rytmískri tónfræði á miðstigi.  Tveir hópar, 1 klukkustund í senn einu sinni í viku 1.ár og tvær klukkustundir 2. ár.
Kennd er rytmísk tónfræði skv. nýrri námsskrá menntamálaráðuneytisins er kom út í haust og er um að ræða samþætt nám er byggir á hefðbundnum grunni tónfræðanáms en með sérstakri áherslu á þætti tónfræða og tónheyrnar er lúta sér í lagi að rytmískri tónlist. Áhersla er á jazzhljómfræði og hagnýta notkun hennar til spuna en einnig á tónheyrn, hlustun og þau almennu tónfræðiatriði er ekki var lokið í grunnnámi.

Tónfræði - Grunnnám
Táknmál tónlistarinnar útskýrt og nemendur þjálfaðir í nótnaritun, tónheyrn, söng eftir nótum, taktþjálfun, hlustun og greiningu. sköpun o.fl. Þá eru hljóðfæri kynnt og mism. blær þeirra. Nemendur vinna og skila verkefnum hér að lútandi og taka grunnpróf í tónfræði í lok námstímans. Hluti námsins er valverkefni sem getur verið t.d. tónsmíð, eða ritgerð.  Kennt er í hóptímum.

Tónfræði - Miðnám
Tónfræði miðstigs er beint framhald af tónfræði grunnnáms og skilyrði er að hafa lokið grunnprófinu. Haldið er áfram með þau atriði sem byrjað var á í grunnnáminu með meiri áherslu á hlustun og greiningu. Þá er einnig farið í  undirstöðuatriði hljómfræði og stutt ágrip af tónlistarsögu. Hluti námsins er valverkefni sem getur verið t.d. tónsmíð, vefsíða eða ritgerð.  Við lok miðnáms er tekið samræmt próf frá prófanefnd tónlistarskóla. Kennslan fer fram í hóptímum.

Tónfræði – Framhaldsnám
Tónfræði framhaldsnáms er beint framhald af tónfræði miðnáms og skilyrði er að hafa lokið miðprófinu. Námið skiptist í aðalatriðum í hljómfræði, og tónheyrn sem kennd eru í aðskildum tímum. Í hljómfræði farið í þríhljóma og tengsl þeirra  og hljómhvörf, og smám saman bætt við sjöundarhljómum, aukaforhljómum, aukaminnkuðum hljómum, napólíhljómi og stækkuðum sexundarhljómum.  Hluti námsins er tónsmíðaverkefni þar sem tónfræði- og hljómfræðiþekkingin er notuð í skapandi verkefni.
Í tónheyrn er takt- og tónskyn nemandans þjálfað og hæfni hans þroskuð til að greina það sem hann heyrir.  Mikið er lagt upp úr söng, hrynlestri, hljómheyrn og ýmsum diktatæfingum. Kennslan fer fram í hóptímum.

Tónlistarsaga I - II
Námið skiptist í 2 áfanga sem hvor um sig er kenndur á einum vetri. Aðeins annar áfanginn er kenndur í senn en nemendur geta byrjað á hvorum sem er. Í Tónlistarsögu I er kynnt vestræn tónlist fram til 1750 og í Tónlistarsögu II tónlist eftir 1750. Í kennslunni er mjög mikið lagt upp úr hlustun. Tónlistarsagan er kennd í hóptímum, tvær samliggjandi kennslustundir á viku.
Nemendur á tónlistarbraut og þeir sem ljúka framhaldsprófi á hljóðfæri eða í söng þurfa að ljúka báðum tónlistarsöguáföngunum.

Valgrein - Íslensk tónlistarsaga
Ekki er um eiginlegt námskeið að ræða en nemendur hitta kennara c.a. 4 sinnum á kennsluárinu og skrifa undir hans leiðsögn ritgerð c.a 20 bls. með efni úr íslenskri tónlistarsögu

Valgrein - Kontrapunktur fyrir byrjendur
Farið er í aðferðir við kontrapunkt frá tímum J.S Bachs, hvernig bæta má rödd við aðra sem er gefin, fyrst nótu á móti nótu, og síðan fleiri nótur á móti nótu og grunnreglur í sambandi við það. Ennfremur skoðaður kontrapunktur í invensjónum eftir Bach. Nauðsynlegt er að nemendur hafi lært töluvert í hljómfræði áður en þeir fara í þetta námskeið.

Valgrein - Hljómsveitaraðstoð

Nú býðst nemendum í framhaldsnámi nýr valáfangi sem kallast “hljómsveitaraðstoð og útsetningar”. Áfanginn felur í sér að aðstoða nemendur í Sinfóníuhljómsveit Tónak eða Stórsveit Tónak á æfingum. Við þetta öðlast nemendur reynslu af kennslu og hljómsveitarstarfi. Einnig munu nemendur aðstoða við að umskrifa/útsetja parta eftir þörfum. Skila þarf ritgerð í lok vorannar og er efni valið í samráði við deildarstjóra Tónlistarskólans á Akureyri.