Rytmískt söngnám er talsvert ólíkt öðru rytmísku hljóðfæranámi að því leiti að röddin sjálf er hljóðfærið. Hún er hluti af líkama hvers og eins og því einstök fyrir hvern einstakling. Röddin er einnig ólík mörgum öðrum hljóðfærum þar sem það er ekki hægt að ýta á einn takka til að framkvæma ákveðið hljóð. Þannig að söngur byggist mjög mikið á heyrninni okkar. Auk þess greinir rytmískt söngnám sig frá öðru rytmísku tónlistarnámi að því leiti að nemendur eru einnig að fást við túlkun á texta og framburð mismunandi tungumála og míkrafóntækni. Nemendur byrja yfirleitt seinna í söngnámi en í öðru tónlistarnámi og því mjög misjafnt hvernig forþekking nemenda á tónlist er þegar þeir hefja söngnám. Sumir hafa lært á hljóðfæri í mörg ár, eða sungið í kórum áður en þeir hefja söngnám en aðrir hafa ekki stundað tónlistarnám áður en þeir byrja að læra söng.

Markmið rytmíska söngnámsins er að kenna nemendum heilbrigða raddbeitingu, túlkun, framkomu og míkrófóntækni. Nám í rytmískum söng skiptist í þrjú stig, grunnstig, miðstig og framaldsstig. Námið er einstaklingsmiðað og er því misjafnt hversu lengi nemendur eru á hverju stigi, en reikna má með að nemendur séu um tvö til þrjú ár að meðaltali að ljúka hverju stigi. Allir nemendur fá einkakennslu í söng klukkutíma á viku. Auk þess sækja nemendur undirleikstíma, samsöngstíma, tónfræðitíma og tónheyrnartíma. Spuni er stór þáttur í rytmísku söngnámi og þjálfast nemendur í tækni til að takast á við þann þátt námsins.