Strengir

Steinarnir eru strengir,  
strengina vatnið knýr.  
Gaman það væri´ að vita  
hvað í vatnsins huga býr.  
 
Hvaðan skyldi það koma  
hvert er heitið þess ferð!  
Síðar á öldum söngsins  
samferða því ég verð.  
 
Lyngið á líka strengi,  
leikur blærinn á þá  
söngva sorgar og gleði  
er í sálum kveikja þrá.  
 
Vorljóð draums og vonar  
veröldin syngur öll.  
Berast vil ég með blænum  
burt yfir hæstu fjöll.